Datorren urriaren 1ean, CEINPROk Erasmus Day jardunaldiaren lehen edizioa egingo du. Informazio jardunaldi horretan, Erasmus+ programak Europako enpresetan praktikak egiteko eskaintzen dituen aukerak aurkeztuko dira.

Saioan, programaren alderdi nagusiak, aukeran dauden helmugak eta parte hartzeko prozesua azalduko dira. Gainera, ikasle ohiek nazioartean izandako esperientziak partekatuko dituzte, atzerriko egonaldi batek arlo akademikoan, profesionalean eta pertsonalean duen balioa bertatik bertara erakusteko.

Jardunaldiak CEINPROk nazioartekotzearen alde egindako apustua islatzen du. Ikastetxeak 20 urte baino gehiago daramatza Erasmus+ proiektuetan parte hartzen, eta 200 ikasle baino gehiagori Europako 10 herrialde baino gehiagotan mugikortasun esperientziak izateko aukera eman die. Ekimen horiei esker, ikasleek lanbide gaitasunak garatzeko, hizkuntza trebetasunak hobetzeko eta lan merkatuan gero eta gehiago baloratzen den ikuspegi globala eskuratzeko aukera dute.